Izarraitz barrutik
Izarraitz mendigunea kareharriz osaturik dago eta honelako materialezko mendietan Karst-ak sortzen dira, hau da, urak eragindako disoluzioaren ondorioz hainbat formazio sortzen dira. Hauetako asko mendien gainazalean ikus daitezke, lapiazak, dolinak, poljeak…baina beste batzuk ikusteko mendiaren barrura sartu behar da.
Nahiz eta Izarraitzen ehundaka kobazulo egon hemen Izarraitz barrutik ezagutzeko 2 proposamen dituzu. Zergatik bi hauek? Ba irisgarritasun errazekoak direlako, barrura sartzeko tresna edo material berezirik ez delako behar eta inongo arriskurik ez dutelako.
Ugarteberriko kobazuloa: Lasturko harrobiaren aurrean, errepidea gurutzatu eta beste aldean Ugarteberriko kobazuloa dago. Sarrera errepidetik 15-20 metrotara dago, hainbat metrotako altuerako «ate» bat dauka eta barrura sartuta kabidade nahiko zabala du.
Aitzbeltzeko kobazuloa: Mendaroko Aranerrekatik abiatuta 2,4 kilometrotara dago. Kobazulo ederra da benetan, sarrera zabal eta ikusgarria dauka eta 200 metroko sakonera horizontala. Barrura sartutakoan inongo zailtasunik gabe gela edo areto desberdinak ikusi daitezke eta hauetan koladak, estalaktita eta estalagmitak ere bai.
Bertara iritseko:
Mendaroko herrian Aranerrekan barrena Lizarrola baserrira iritsi behar da. Puntu honetan errepidea amaitu egiten da eta harritxintxorrezko pista batetik jarraitu behar da. Baserriko atarian ura hartu daitekeen iturri bat dago. Ateza metaliko bat zeharkatu eta tarte txiki baten ostean bidegurutze bat dago.
1go puntua: Bidegurutzea. Puntu honetan ezkerreko bidetik jarraitu behar da. Batere aldaparik ez izatetik aldapa esanguratsua izatera pasatzen da bidea. Puntu honetatik aurrera Atxuriko puntaren ezkerreko aldetik doa bidea eta honen horma itzelak beratatik bertara ikus daitezke.
2.puntua: Ateza metalikoa. Gurutzatu eta aurrera jarraitu behar da lurrezko pista zabal eta aldapatsuan.
3.puntua:Bidegurutzea. Ateza metalikoa gurutzatu eta tarte txiki batetan gora egin ondoren botatako pinutegi baten parean ezkerretara jo behar da bide zidor estuago batetatik.
4.puntua: Bidegurutzea. Azpiko bidegurutzetik tarte txiki bat zuzen zuzen igo ostean ezkerretara geratzen den bidezidor estu eta ez oso garbi batetatik jo behar da, lurreko harri batekin markatua dago (hurrengo bihurgunera iritsi baino 50-100 metro inguru lehenago). Lehenengo metroak sasiarekin itxi xamar egoten dira batzutan, baina ondoren bideak ez du inolako galbiderik, bideseinaleak daude eta bidea laua eta oso erosoa da.
5.puntua: Azkenengo bidegurutzea. Tarte bat aurrera egin eta gero bi harri-pilarekin markaturik dago kobazulora iristeko azkenengo bidegurutzea (puntu horretatik iada ikusi-somatu daiteke kobazuloaren sarrera.
